Dear Nesta,
How life treatin’ yuh? I down hey, sweatin’ dese days like a pot cover, but it only reasonable to expeck dis wedduh, ’cause we now in de hurricane season an’ anyt’ing could happen! I onderstan’ a couple mo’ storms dan nusual ’pon de calendar dis year, so we got to be ’pon de look-out!
Wevver or not God is a Bajan, all de islan’s in de region, not only we, need ’E help durin’ dis time, so keep evuhbody in yuh prayers, hear? Don’ be selfish an’ lef’ out Trinidad an’ Jamaica! It en good to hol’ people in yuh min’!
De papers had a very int’restin’ picture couple weeks ago! Soon as I see it, I remember my mudduh words, “Necessity is the mother of Invention”, an’ it seem dah is wuh happenin’ in dis instance. De Jews like duh gone back to Jerusalem an’ two “frien’s” tryin’ to bury de hatchet.
How deep dah hatchet gine get bury is anybody guess, ’cause de woun’ it inflick las’ year wasn’ easy to bear, an’ dem sorta t’ings tek a while to fuhget, but ef dem two gettin’ back togedduh to put duh party ’pon a steady course, dah could spell some trouble fuh de present Guvment!
De DLP en de same sence Mr Thompson gone, faif. He deaf lef’ a hole – no, a crater – in dah party, dat tekkin’ long enuff to fill! ’E successor treadin’ water so sof’ly, he jes’ producin’ ripples, no big “surfin’ waves” rollin’ in yet! ’Pon de ethuh han’, Owen snappin’ at de Guvment heels whichevuh way duh turn, an’ fuh de slightes’ reason, always sugges’in’ elections.
We hearin’ t’ings improvin’ li’l bit, but dah hard to believe, when prices appear to be fuhevuh marchin’ upward an’ onward! Water, electricity, bottle gas (always up, never down), petrol fuh de car (jes’ tekkin’ yuh from one gas station to de nex’), telephone, food, evuht’ing – all risin’ like yeas’!
Oil prices mus’ tek de mos’ blame fuh we hardship, but dey en no way a-tall we could get a ease? Startin’ wid de Agriculture Minister promise ’bout a bigger basket o’ goods! When dah comin’ forf? We waitin’, an’ starvin’!
Muh head gettin’ giddy from de reports I hearin’! So as to keep we happy, de Guvment claimin’ t’ings improvin’ slowly, while two big-up ovuhseas agencies got duh own diff’rent opinions! One sayin’ de economy lookin’ stable an’ de ethuh downgradin’ we domestic currency ratin’.
Which o’ de t’ree gi’in’ we de true picture? I en know wuh to believe, but one t’ing I know, life ruff fuh mos’! I hear de Budget dat comin’ up, gi’in’ we li’l tax ease, but I en gine start counkin’ chickens, (I could scarce buy duh anyway!) – I waitin’!
De PM went off to China fuh talks, an’ come back wid li’l ovuh $6 million – pity it wasn’ mo’, but, I suppose, eat li’l, an’ live long! At leas’, some local projecks gettin’ de help duh need! Befo’ he went ’way, he rattle de Cabinet li’l bit, an’ one good t’ing dat drop out, was a ministry fuh Denis Kellman – even doh dat Cabinet now burstin’ at de seams!
Denis, I glad yuh mek it at long las’! It shoulda been retroactive!
Tek care o’ yuhself
Yuh frien’ Babsie
