Dear Nesta,
“Damned ef yuh do an’ damned ef yuh don’t!” I come ’long hearin’ dis sayin’, an’ it does prove true all de time! ’Cause dah is exackly wuh President Obama facin’ sence he come out an’ gi’e ’e official blessin’ to same-sex marriages!
Dis recent news stir up bare confujun, comin’ from as far away as Africa! Even in dis neck o’ de woods, some been voicin’ duh strong disapproval! Ef we din’ know how mos’ African countries look ’pon lesbians an’ gays, we realize it las’ year when you prime minister t’reaten de “big stick” approach to wifhol’ fun’s from any country dat din ‘gree to gi’e homosexuality de “green light”, an’ get a tas’e o’ how Africans really feel ’bout it!
Now, it is Barack turn to tas’e duh wraff! I wonder wuh sort o’ welcome he would get ef ’e had to pay a visit out dey anytime soon, neh? Duh gine cross ’e off duh welcomin’ lis’ fuh dis decision?
Back home, ’e may be gettin’ “hugs an’ kisses” from lesbians an’ gays all ’cross Amurica dat could hardly wait to get in de church to tie de knot, but de Republicans (dem always in ’e skin, day an’ night, anyhow) an’ de “holier dan thou” church folk sharin’ out nuff licks! I hear African Amuricans en too please a-tall ’bout dis decision, but we jes’ got to wait an’ see ef dat displeasure gine disappear when duh get in dah boof to cas’ duh “X” later in de year!
Obama mussee had some special reason fuh comin’ out at dis time in support o’ same-sex marriages, ’cause, from how I see it, he really en had no need.
He claim it en got neffin to do wid politics, aldoh we all know dis is election year, an’ de Republicans out fuh blood! But I ten’ to believe ’e, ’cause when he end de “don’ ax, don’ tell” policy, to mek life mo’ easy fuh lesbians an’ gays fightin’ fuh duh country, evuhbody shoulda realize at dat time whey ’e sympat’ies lie!
Dah din cause tummuch fuss an’ life went on as nusual! Even befo’ dat, certain US states was quietly goin’ ’long an’ allowin’ same sex marriages, perform by gay an’ lesbian pries’s, an’ I en been hearin’ de same outrage comin’ from de Republicans an’ ethuh groups dat now up in arms!
But I suppose it is a diff’rent ball game to declare to de whole worl’ dat de president of the great US o’ A now accep’ same sex marriages! Who is to know hummuch ethuh countries won’ start t’inkin’ ’long de same lines?
I onderstan’ we nex’-door nighber, Trinidad, gine “sooner or later outline its position regarding same sex marriages in the country”! Cuba don’ seem to be far behin’ in duh t’oughts! Who nex’ in line? Wuh, dis could turn into a tsunami! Wanta bet dat in de nex’ few years or so, de majority gine accep’ it as a evryday event, an’ de res’ dat don’ ’gree wid it, gine be de outsiders?
Dis worl’ in one topsy-turvy state, faif! Mankine changin’ de meanin’ o’ de Bible to suit duhselves, an’ now got evuht’ing in sech a state, dat I sure de Almighty en gine recognize dis planet whenevuh He decide to come back! Right is now wrong, an’ wrong now right, an’ evuhbody doin’ wuhevuh de france duh like! Doh I agree dat we shun dictate to one anethuh how to live duh life, howevuh I try, I jes’ cyahn bring muhself to accep’ de belief dat dey en neffin wrong wid same-sex marriages!
Tell yuh, de Almighty got nuff issues to settle when ’E get back! Lord, come fuh Yuh worl’!
Tek care o’ yuhself
Yuh frien’ Babsie
