Dear Nesta,
Girl, couple weeken’s ago, de Democratic Labour Party (DLP) put on duh 57th Annual Conference an’ I was lucky to hear an’ see some o’ de final day speeches ’pon de computer – ef yuh please.
Don’ ax muh how, ’cause I cyahn help yuh, as I en got de slightes’ idea ’bout it, but muh gran’son – he know de computer backwards – hook muh up to de DLP Conference Room shortly befo’ de speeches start. I hear it call streamin’ . . . or somet’ing so.
Now you know I don’ hol’ no cards fuh no party, but it always good to know wuh gine on so yuh could judge fuh yuhself an’ don’ get bamboozle wid no sweet words from politicians.
Some does talk so purty dat sometimes, ef yuh en too sharp, yuh lookin’ right when yuh should be lookin’ lef’. So I was glad to know I woulda been able to hear de PM speak ’cause, gi’e Jack ’e jacket, ’e able to hol’ ’e own when it come to mekkin’ speeches.
I only went to Brumley so sometimes I don’ onderstan’ – nor ’gree – wid all he say, but I still like to hear ’e speak. I always ready to pick up a new phrase or two; it would show I got brains. Wedder yuh like ’e or not, he really know how to use de English language.
It en de PM speech I wanta tell yuh ’bout, doh. It was de Reverend Wood sermon dat mek muh stop an’ lissen. It was true as John 3:16. Chile, ’e hit de nail ’pon de head wid ’e words ’bout politicians an’ duh broken promises. Hummuch politicians yuh see after de election ?
De onlies’ time yuh sure to see dem is at yuh funeral an’ den yuh cyahn see dem anyhow ’cause yuh dead. I en gine argue dat some en got de people int’res’ at heart an’ always ’bout de districk checkin’ ’pon duh, but don’ fool yuhself – dem in de majority.
Ef yuh en ’pon dah “chosen few” lis’, yuh could seek high or low, usin’ de stronges’ pair o’ binoculars . . . yuh would spot de Norf Star firs’. I know dat de onlies’ place I see my representative dese pas’ five years was in de papers, but I jes’ put dah down to he not knowin’ whey he constituency begin or en’, po’ fella.
When de Reverend p’int out how duh gine want we vote at de nex’ election, an’ implore an’ beseech dem not to wait ’til den to come ’roun’ visitin’, but to do it now, I c’n help but smile.
I onderstan’ two new faces tryin’ fuh de seat out hey, an’ I waitin’ to see who gine show up. Y’know how new brooms sweep, so it might be diff’rent dis time as bofe gine want to mek a good impression . . . fuh de firs’.
Reverend Wood also remin’ duh that God in control an’ ef duh acknowledge ’e wid all duh hearts, He gine bring dem t’rough. Pray an’ humble duhselves, seek de Lord face, turn from any evil ways an’ ’e blessin’s gine await dem.
I en know hummuch o’ dem inten’ to follow de Reverend instructions, but I know I safeguardin’ muhself fuh de future. Anybody canvassin’ ’roun’ hey en need to promise me no Grantleys, Cockspur, Mount Gay nor neffin to eat fuh my vote. Jes’ sign a li’l contrack I gettin’ ready, to mek sure I get better treatment nex’ time:
“I . . . do solemly swear dat ef de Lord bless muh an’ I get lucky to become representative fuh de area o’ . . ., I promise faiffully to mek it my duty to visit dat area mo’ dan once in five years an’ pay attention to de needs o’ all – not some – o’ my constituents at all times.”
Yuh t’ink dah would wuk?
Tek care o’ yuhself
Yuh frien’ Babsie
