De days gettin’ hot enuff an’ it en only de sun causin’ dis heat. Put some o’ de blame ’pon Crop Over – we big money-spinner! T’ings warmin’ up!
Frien’s an’ fambly startin’ to come in fuh all de fun an’ games! Pan all ’bout – in de Square, at Ilaro Court, ’pon de san’ – an’ las’ weeken’, Semi-Finals, Junior Kadooment, Soca Royale, all follow one after de ethuh, mekkin’ t’ings bizzy enuff. Dis leadin’ up to de big day – Kadooment Day – nex’ Munduh, when yuh gine see a bariffle o’ people comin’ out to do dixie ’pon de roads!
Nowadays, I don’ get involve tummuch in Crop Over. I used to ketch one or two tents but de calypsos o’ today don’ suit my tas’e no mo’.
Calypsos used to have sweet melody an’ good commentary, but all dah change. Now, de youff tekkin’ over an’ party songs fuh party animals is de order o’ de day!
Dey en no need fuh proper lyrics, jes’ jump an’ wave piece o’ rag in yuh han’, an’ shout, not sing, couple words over an’ over ‘bout “de bumper” an’ call it calypso!
We lucky some good calypsonians still ’pon de scene. Dem got muh lookin’ forward to de Finals comin’ up Friduh night!
A few calypsonians was headin’ fuh trouble over some o’ de words in duh songs! De NCF “advise” duh to mek certain changes, whichin duh had to do fuh de Semi-finals las’ Friduh night!
Now, dem said-same songs did playin’ ’pon de radias all de while widout any changes to de words, so I need somebody to tell muh wuh mek de NCF suddenly wake up to de fack dat change was necessary! Certainly, ef it was because o’ tummuch “smut”, duh had evuh right to mek de calypsonians clean it up!
Ef de words did referrin’ to a politician or any ethuh “big maguffie”, we all know dah simply en allow an’ duh would ha’ to mek a change! Aldoh calypso suppose to be social commentary, dah special group outta boun’s an’ yuh dare not utter one word – even ef it true – ’bout duh!
People in big-up positions cyahn only expeck evuhbody to be bowin’ an’ scrapin’ to dem; duh gine get criticize too an’ as long as it en spiteful, tek it wid a smile. Don’ be so techous. Look how we Prime Minister en objeck to AC song ’bout ’e!
Kadooment dis year, fuh me, gine be very quiet! Once, yuh woulda ketch muh by de roadside watchin’ de bans’ comin’ down from de Stadium, but I done wid dat. I refuse to lef’ my home to go an’ watch size 18 figures squeezin’ in size 12 costumes, an’ men – de drinks a’ready tekkin’ effeck – wukkin’ up ’pon women, doin’ dixie, dat don’ lef much to de imagination! I en no saint but dah behaviour too lewd fuh my tas’e.
I always wonder ef dah Christian ban’ don’ feel outta place in dah crowd. My nighber say dem tek de opportunity to witness an’ pass out “tracks”, tryin’ to save souls! Dah’s a joke, right?
Now, tell me which body in dah crowd int’rested in hearin ’bout God when all duh int’rested in doin’ is wukkin’ up, bennin’ down, an’ knockin’ back nuff alcohol? Gimmuh a break, do!
Tek care o’ yuhself
Yuh frien’ Babsie
