Dear Nesta,
WELL, GIRLCHILE, two down, ten to go! I talkin’ ’bout de monfs, yuh moojin! Yuh en realize two monfs in de year gone a’ready, wid Easter ’roun’ de corner dis monf-en’?
Anyhow, I hope t’ings goin’ fine an’ yuh awright, even ef yuh now realize yuh been eatin’ horse meat all dis time widout knowin’ it!
I read in one o’ de papers yuh sen’ dat apparently it even reach de Queen plate, aldoh de aut’orities was quick to come out an’ deny it!
Dese days, mos’ times yuh en know wuh de France yuh eatin’ but now dat dis scandal
hit de headlines, people might start tekkin’ better care o’ de t’ings duh puttin’ in duh stomach!
Sence de election, bofe political parties been t’rowin’ charges at one anethuh ’bout vote buyin ’pon Election Day! In fack, after de DLP victory, de PM complain ’bout people buyin’ votes an’ call it “a corrup’ aspeck o’ de recent campaign”, but I wonder how de aut’orities gine stop dat.
All dis back an’ forf now cause de Coalition of Unified Parties to wake up an’ try to get in ‘pon de ack, so duh seekin’ legal advice wevver duh could ax de High Court to overturn de results o’ de vote! Lord have ’Is mercy! Dah’s all dis country need right now – anethuh election to cause bare confujon! I wonder wuh mek dem t’ink it is possible fuh dem to get de results overturn.
Evahbody did waitin’ – hol’in’ duh breff – to hear when de PM would name ’e Cabinet, an’ as nusual, sharin’ out nuff advice as to who an’ who he should choose, fuhgettin’ dat he would be de bes’ body to know who he want in ’e Cabinet! An’ dah’s jes’ wuh happen!
Las’ T’ursduh night gone, ’e come ’pon de TV an’ name 16 Cabinet members, even includin’ two dat people rejeck at de polls, an’ t’ree parliamentary secretaries! Well, yuh know de sayin’ – “De mo’ t’ings change. . .” – but he is de boss an’ we got to tek de time from he!
He also mek some Cabinet shif’s. Michael Lashley gone to Transport, Denis Kellman replace ’e in Housin’. Donville Inniss outta Healf an’ over in Industry, International Affairs, Commerce an’ Small Business Development, replace by John Boyce, an’ Haynesley Benn not only lose ’e ministry but also get drop from de Senate!
We now got to wait an’ see how dese changes turn out!
I nearly fuhget to leh yuh know we got a new Leader o’ de Opposition – Miss Mia Mottley – to tek over de reins! Nuff people in de Turnin’ been arguin’ ’bout de BLP chances o’ winnin’ de Election ef Mia did at de head o’ de party at dah time. Don’ fuhget, de Opposition get almos’ 50 per cent of de votes an’ de DLP jes’ scrape home!
But neffin befo’ de time, right? I only hope de frien’ship we see bloomin’ between she an’ Owen durin’ de election en gine dry up an’ ’e gine be ’roun’ to help keep de BLP ship ’pon course!
Tek care o’ yuhself,
Yuh frien’ Babsie
