WHY IS IT suh hard fuh some people tuh let go? Duh got a lot o’ people who, nuh matter how painful, confusing, burdensome even stressful something is, would still hold on tuh it, knowing full well dat it would serve dem better tuh let it go.
Duh got some people who like tuh exact duh poun’ o-flesh. Ya would hear dem saying dat dem put summuch and summuch years in this and dem ain’t gine leh nuhbody who ain’t do one frups fuh it now come along and take it from dem just so. Some people like tuh hold on tuh things, even if it killing dem.
It does happen wid people in all sorts o’ relationships, be it jobs, marriages, politics, businesses, I mean everywhere and some people, instead o’ walking away and keeping duh sanity and peace of mind, would prefer tuh either suffer through it and or make other people suffer through it, all because dem cahn leh go.
I know a good few situations like these and nuh matter how ya try tuh tell people tuh just let it go and move on, duh like duh feel like duh missing or losing out pon something, even giving ’way something dat is rightfully “dem own”. It is like a friend o’ mine who was in a job fuh almost thirty-something years and in recent years all she has been doing is complaining and complaining all the time. Summuch so dat I get tired telling she off ’bout leaving the people place. But not she – she prefer tuh get up morning after morning, get she self ready and grumble and complain all the way tuh work, even though it making she sick as France and got she at the doctor all the time. She cahn leh go. All she talking ’bout is she pension and something ’bout the amount o’ years she put in.
Duh got people in relationships, both women and men, who know dat dem partner got dem miserable as France and nuh matter how hard dem try, it ain’t working but duh still gine home evah single evening tuh the lot o’ quarrelling and fighting. Then, the next morning duh does wake up tuh the same thing but prefer tuh go tuh work wid stress. Fuh whatevah reason, dem cahn leh go, so they would prefer tuh be miserable and make other people miserable too; especially if duh got children in the relationship, dem gotta suffer.
Another set o’ people who cahn let go is mothers. Duh got some who, nuh matter how old duh sons get, duh refuse tuh leh dem go. The girls could guh ’long ’bout duh business but duh does hold on pon the boy children.
Look, you could imagine, a big, hard-back forty-something-year-old man who might even have children from one or two women, still living in he mother house? And look, when he do foolishness and the women start tuh call at she house fuh the man, the mother does lambaste dem in cuss.
Talking ’bout holding on pon boy children: some mothers does know the man got a staunch woman but would still encourage duh sons tuh bring another woman at dem. Another set, even though the boys married, does still playing dem putting aside a share o’ food and encouraging dem tuh come fuh lunch evah day. Dem is boys dat holding on pon duh mothers’ apron strings. Dem cahn leh go niether.
Politicians is another set o’ people who does get real comfortable in the office and all of a sudden like duh believe dat duh can’t or shouldn’t be moved. It belong tuh dem, so duh does get big-headed and cocky and do a whole lot o’ junk. Then, up comes election time and you won’t believe dat it is the same person or persons who ain’t summuch as show duh face tuh duh constituents or do a pang fuh dem. But duh finding it hard tuh let go now, even though some o’ dem old, tired and ain’t got nuh new ideas; but duh back up in ya face again, begging you fuh another five years. Dem cahn leh go but it is time tuh let go!
• Mavis Beckles was born and raised in The Orleans. She has an opinion on everything.
