Girlchile, nuff t’ings happenin’ ’pon dis li’l rock dese days, but firs’ an’ foremos’, lemmuh tell yuh I onderstan’ de political arena gine lose Mr Owen Arthur. ’E decide no mo’ politics fuh he in de future.
Well, ’e had a good long run – few ups an’ downs in ’e 40 years, 15 o’ dem as Prime Minister – but when ’e look back, ’e shun got tummuch cause fuh regrets. When de BLP loss de election in 2008, de country wasn’ nowhey in de state it is now, so he had to be doin’ somet’ing right all dem years.
Philomena – one o’ ’e bigges’ fans – t’ought he woulda mek it agen as PM dis las’ election, but onfortunate fuh bofe he an’ she, dat was not to be. I had one question fuh she, but she c’n answer.
Now, when David Thompson pass ’way, Owen an’ nuff mo’ was lookin’ fuh elections to tek place any minute, right?
When ’e had dah big bassa-bassa wid Mia an’ she had to step aside, ’e claim dah was ’cause people ax ’e to return an’ tek back de reins. Well, how come all dem people din able to get ’e back in de drivin’ seat dis las’ election?
But I always say, God don’ like ugly an’ yuh cyhan sow limes an’ reap apples, an’ dah episode wid Mia wasn’ nice a-tall. He’s a bright man, so ’e mussee realize dat he days as Prime Minister en comin’ back – de win’s surely en blowin’ in dah direction no mo’ an’ he coulds well move on. Enuff is enuff.
I don’ doubt ’e got big plans fuh de nex’ chapter in ’e life when ’e finally retire. Diff’rent, an’ mebbee better – who knows? In life, neffin nor no one does las’ fuhevah. So, good luck to wuhevah he choose to do in de future. But I don’ t’ink dis is de las’ o’ Mr Arthur.
Now, dis change mean dat after all dese umpteen years, when Owen does finally step away, de people o’ Sin Peter gine get a new face representin’ dem in Parliament. Once ’pon a time, I woulda place heavy bets ’pon Haynesley Benn but sence dis las’ election, I en so sure now.
I en know wuh he coulda do to offen’ de higher-ups, but it sure look to me like he get “diss”. Somet’ing would hav’ to be really wrong fuh two o’ ’e colleagues to get rejeck by de electorate, an’ in a couple days, get put in de Senate to tek back up ministerial jobs widout missin’ a beat.
’Pon de ethuh han’, all en gone well a-tall fuh po’ Haynesley. Even li’l Jack Horner do better dan he. At leas’ he put in ’e t’umb an’ pull out a plum, but de former Senator c’n even get a plum seed.
But politrics is a strange game an’ who is to know ef he en got some reassurance dat all gine be well, ef he jes’ “hol’ strain”. Anyhow, my frien’ Philomena dat believe she is one politician, got a diff’rent feelin’. She say Owen an’ Haynesley is fambly, so it could be dat Owen – a strong believer in de “politics o’ inclusion” – gine try an’ persuade ’e cousin to hop over (de master, Hammie, could gi’e ’e nuff tips ’pon dat) an’ den gi’e all ’e backin’ when de time come.
When I hear dah madness, I had one sugges’ion fuh dat woman. Ride straight to de airport, hop ’pon de firs’ plane she see – not fuhgettin’ to cahy ’long certain politicians wid she – an’ fly right outta muh sight. She en been speakin’ to muh fuh days.
Tek care o’ yuhselfYuh frien’ Babsie
